U bevindt zich hier: HomeAly Freije

Aly Freije

Wie doun wat wie kinnen

Bliekboar ontgait heur
wat zai heur haart aandoun kin
deur stokkend olle dagbouken zuiken
hou doar vergees in toal oetweken is
vingers dij as dwoalgasten over toetsen goan

laiver zol ze ofsproaken verschoeven
op de laange boan, zuk herpakken in n rugzak
de sniemandoline dumpen
overnij de zaailen hijsen
mit twij atletische hoazen aan heur zied
in n saunahoeske over d’Oostzee voaren

de bewegen van n vogelvleugel
t gonzen van n vlaigwiel
vangen in n zin

en elk café en tapasbar zol heur begroeten
mit verlichte neonletters
uw koninkrijk kome

overaal zollen reservefietsen stoan.

 

© Aly Freije

De Nederlandstalige versie staat in Door het vanggat, uitgeverij In de Knipscheer, 2016


*Amazone

t Heersen bevaalt mie tussen veur- en achterhaand
de inhollen erotiek van n vorstin
dij mit heur knot onder n herenhoud
hoog aanspannen borsten
veerdeg van haand heur peerd aanstuurt

mor ook de ziedeglaans op kastanjehoed
het trekken van t vel bie t aaien, waarmte
stomend van swaiterge ruggen, t flemen
van taanden in n nek

k wil zunder zoadel mit heur hier vandoan
op peerderuggen over prairies joagen
opwaaiend hoar mit veren tugen

as de peerden in mekoars moanen bieten
de achterbainen de lucht ingooien
veurbainen klimmend mekoar omhelzen
mit stommelge hoefkes scholders aaien

kus ik de zaachte lippen
van mien landoadelamazone.

 

©Aly Freije

*Bij de paardenkeuringen op de Ossenmarkt op 28 augustus


Ook in het Nederlands verschenen in ‘Door het vanggat’, uitgeverij In de
Knipscheer 2016