U bevindt zich hier: HomeHarry van Velsen

Harry van Velsen

Zo baargt elke rug n aigen verhoal

Mit geuzenlaidbouk veur ogen
wer hai doodschoten ien zien hoes

boukhandel kreeg zien noam
– veur altied: Godert Walter

 

Ien Òlle Ebbingestroat
onner roodgeelblaauw abstract van Mondrioan
stoan bouken overtugend veur t roam
rug aan rug op schappen tot ien achterhoes

aal mit n aigentiedse bòsschop:

– hou wie ons as woorden bewegen
   bedenken wie zulf –

Zo baargt elke rug n aigen verhoal
en kómt stilswiegend bie laans

 

‘Wee je der n kop kovvie bie?’

 

© Harry van Velsen

Vrij noar Boekhandel Godert Walter 75 jaar in het hart van Groningen, Uitgeverij Passage, 2017


Tussenbredjes

Letters liggen van a tot z bie nkander
kloar veur vannijs gebroek

oetrouptaiken en vroagtaiken
zetten wizzeghaid en oarzeln ien

punt en kommoa liggen
kloar om ien te griepen

streepkes wachten rustig oaf


k zet letters van mien noam
ien spaigeltoal en taiken
achter mekoar ien t rek
vaasthòlden deur tussenbredjes

Pas noa t drukken op paars
zai k miezulf as woar weerom:

‘Ik bin mien aigen verhoal.’

 

© Harry van Velsen

Cursus typografie Grafisch Centrum Groningen


En zai vlugt

Der staait n vraauw ien vol ornoat
volledeg vrij te wezen en zo
n veurbeeld vot te geven
 
Zai het rokken over rokken trókken,
nuverste stoffen oetkozen,
heur ooghoaren op ooghoaren plakt
t liekt as of zai aan grond ankerd is,
as of zai zaandzakken laans heur zied stoan het
 
moar onder kroezen bongelt zai
mit heur bainen ien locht,
roakt grond nooit aan mit vouten
 
zo dat zai altied gevuil het dat ze vlugt
allaain nog ain moal ekstroa oam hoalen mout

om doarnoa zo mor vot te zweven
 

 

aan de Emmakade, bij het kunstwerk ‘Ultra’ van Silvia B. 

vrij noar En ze vliegt Lilian Zielstra ien: Ik zag een man met een bos bloemen naar de Nieuwstad gaan, Uitgeverij Passage, 2019


Gedìnkens

Op Emmaplaain
stoan ien graas en bloaren tussen singels
bòsschoppen van aal weer n tiedje leden.

Haardstain en messing woarschaauwen
tegen broeken van kernwoapens
gedìnken van baange twiefeltoukomst
– wèl drokt as eerste op knòp

Ien t midden van plaain ròpt videobusstop
mit stoalgoas op
tot biezundere weerden as
veurbeelden van nijmoodse dieverdoatsie

Tegenover kestaanjeboom
staait lindeboom van keunegin
n ode veur opoe van laankmanstied
klaaindòchter staait aal kloar veur noaste stek.

Omgeven ligt der wat roeg en rousteg bie
zo as tegenoreg
doagen aal weer haarsteg kòrder wòrden

– kestaanjes vringen zok oet stiekelbolster

 

© Harry van Velsen

Anti-kernwapenmonument en videobusstop Emmaplein