U bevindt zich hier: HomeRik Andreae

Rik Andreae

Zip

Der kin noar binnen keken worden,
noar boeten tou is t veurbie.

t Geluk wappert veur roamen.
Minder nog as wind valt t nait op.

Onder vlouer is sinterij verstopt,
zodat wat der is, mit harde kòl

van Ierland in n winterfilm, niks is.
n Leeg hoes het ontkomen koamers.

Verloaten is nait leeg genoeg. Zip
t versukerd glaas, zip t zulverzwaart,

de vergroezelde stainen, de bedumelde baalk.
Zip de stad, haile stad in binnenbuus.

 

© Rik Andreae


Oosten

k Mout ja ais noar t oosten goan,
noar de stad Zunne-op-Beton,

doar heb­ben ze gain nommerdag.
Doar is stilte as mist in mörgen.

Onderaan heuvel speulen kinder der
op groaven. Lachen derbie – dat t liekt

of ze jong binnen en sturven en wandeln.
Wel-is-Salamander? hait heur speulen.

Zo’n baist woarvan gainent wait
wat veur vèl t het of waar t slept.

Joa, dat t n rozenvreter is
en springt as n kat vol vlooien.

k Zel, ainmoal doar, wat zeggen
over tied, wereld en wied van hoeze.

 

© Rik Andreae


Oadem

Oadem is t waark van n kind,
wind de wènst van n leven.

Wat derin mitzweeft is spin
in tonglikkende duuster.

Is vinger laangs vette raand,
is inhold, is kiek in de pot.

Is roggenstoet mit jong belegen.
Is kat dij aanrecht op springt.

Is de vraauw mit grode ogen
op hörn van Klaine Appelstroat.

 

© Rik Andreae