U bevindt zich hier: HomeGedichten bij de poeziëwandeling

Gedichten bij de poeziëwandeling

Op 23 november startte vanuit de Prinsentuin te Groningen vanuit de loofgangen de poëziewandeling Dichten in Stad. Op de route van c.a. 3 kilometer werden op diverse locaties gedichten voorgedragen. 

Hieronder staan de gedichten die tijdens de wandeling zijn voorgedragen.


Jan Glas

Prinsentoen

Hou holdt n stad n toen oet tied.
Stamboukrozen, peerbomen.

Aalbeerns. Krudoorns.

De ien deftege hegen smoorde wildernis.

Of holdt tied hom zulf bezied?
Achter dij muren, as ien n kerk.
Ien lijte.

Aanlegd en overzichtelk liek religie.

Twij iengangen
noar dezulfde ainzulvege stilte.

 

© Jan Glas

Uit: Dubbel Glas (kleine Uil, 2012)

Alle gedichten van Jan Glas


Rik Andreae

Zip

Der kin noar binnen keken worden,
noar boeten tou is t veurbie.

t Geluk wappert veur roamen.
Minder nog as wind valt t nait op.

Onder vlouer is sinterij verstopt,
zodat wat der is, mit harde kòl

van Ierland in n winterfilm, niks is.
n Leeg hoes het ontkomen koamers.

Verloaten is nait leeg genoeg. Zip
t versukerd glaas, zip t zulverzwaart,

de vergroezelde stainen, de bedumelde baalk.
Zip de stad, haile stad in binnenbuus.

 

© Rik Andreae

Alle gedichten van Rik Andreae


Tonko Ufkes

Hier leggen

Dat leggen. Deur de dieken bonden
wel wiet valt hier de wereld stil
woar wotter aans votstromen wil
het t nou n eigen rustplak vonden.
 
Van boven spiegeln zun en wiend
– zo t liekt n weerlicht die hum dellijt –
as n rivier die t laand niet scheidt
mor dapper weerskanten verbiendt.

 

© Tonko Ufkes

Alle gedichten van Tonko Ufkes


Aly Freije 

Wie doun wat wie kinnen

Bliekboar ontgait heur
wat zai heur haart aandoun kin
deur stokkend olle dagbouken zuiken
hou doar vergees in toal oetweken is
vingers dij as dwoalgasten over toetsen goan

laiver zol ze ofsproaken verschoeven
op de laange boan, zuk herpakken in n rugzak
de sniemandoline dumpen
overnij de zaailen hijsen
mit twij atletische hoazen aan heur zied
in n saunahoeske over d’Oostzee voaren

de bewegen van n vogelvleugel
t gonzen van n vlaigwiel
vangen in n zin

en elk café en tapasbar zol heur begroeten
mit verlichte neonletters
uw koninkrijk kome

overaal zollen reservefietsen stoan.

 

© Aly Freije

De Nederlandstalige versie staat in Door het vanggat, uitgeverij In de Knipscheer, 2016

Alle gedichten van Aly Freije


Nina Werkman 

TIEPTOAVEL

t Toaveltje staait aan t alderleste poadje
tussen n schriefbero en n aiken kaast;
hai stekt mit onbewaarkte holten bast
òf bie zien gladder wreven moatjes.

Persies zo onaanzainlek is zien bloadje:
n tiepmesiene het hom net aan paast.
Mor veur de zeuven ondermoatse loatjes
holdt zuch nog aigenwies n loekje vast.

t Trekt mie derbie: t wil nou wel weer ais rollen
en valen omdeel zo t nog van vrouger wait;
ik steek haand noar hom oet en draai de sleutel.

Doar komt zien ronde tegendroadse reutel     
as holtlemellen deurhin sponnen tollen
en echo gaalmt van onvergetenhaid.

 

© Nina Werkman

Alle gedichten van Nina Werkman


Harry van Velsen

Zo baargt elke rug n aigen verhoal

Mit geuzenlaidbouk veur ogen
wer hai doodschoten ien zien hoes

boukhandel kreeg zien noam
– veur altied: Godert Walter

 

Ien Òlle Ebbingestroat
onner roodgeelblaauw abstract van Mondrioan
stoan bouken overtugend veur t roam
rug aan rug op schappen tot ien achterhoes

aal mit n aigentiedse bòsschop:

– hou wie ons as woorden bewegen
   bedenken wie zulf –

Zo baargt elke rug n aigen verhoal
en kómt stilswiegend bie laans

 

‘Wee je der n kop kovvie bie?’

 

© Harry van Velsen

Vrij noar Boekhandel Godert Walter 75 jaar in het hart van Groningen, Uitgeverij Passage, 2017

Alle gedichten van Harry van Velsen